چک نمبر 98 ٹی ڈی اے(تحصیل کروڑ ضلع لیہ )میں افسوسناک واقعہ — قبر سے میت نکالنے پر علاقہ سوگوار
چک نمبر 98 ٹی ڈی اے میں پیش آنے والے دل دہلا دینے والے واقعہ نے پورے علاقے کو غم و غصے میں مبتلا کر دیا ہے۔ تفصیلات کے مطابق بزرگ خاتون حمیدہ مائی، جن کی عمر تقریباً 80 سال تھی، گزشتہ روز طویل علالت کے بعد انتقال کر گئی تھیں۔ مرحومہ کو اہلِ علاقہ اور عزیز و اقارب کی موجودگی میں مقامی قبرستان میں سپردِ خاک کیا گیا تھا۔
تاہم آج صبح جب کچھ افراد قبرستان گئے تو انہوں نے دیکھا کہ حمیدہ مائی کی قبر اکھڑی ہوئی ہے اور میت تقریباً 70 فٹ کے فاصلے پر زمین پر پڑی ہوئی ہے۔ یہ منظر دیکھ کر علاقے میں کہرام مچ گیا اور اطلاع فوری طور پر پولیس کو دی گئی۔
پولیس موقع پر پہنچ کر شواہد اکٹھے کرنے اور واقعہ کی وجوہات جاننے میں مصروف ہے۔ ابتدائی طور پر یہ معلوم نہیں ہو سکا کہ یہ کسی غیر انسانی حرکت، مذہبی بے حرمتی، یا جانوروں کے حملے کا نتیجہ ہے۔ پولیس نے قبرستان کے اردگرد کے علاقے کو گھیرے میں لے کر تفتیش شروع کر دی ہے۔
اہلِ علاقہ نے اس قابلِ افسوس اور دل خراش واقعہ کی شدید مذمت کرتے ہوئے کہا ہے کہ ایسے واقعات نہ صرف مذہبی اور اخلاقی اقدار کے منافی ہیں بلکہ معاشرتی امن و امان کے لیے بھی خطرہ ہیں۔ لوگوں نے اعلیٰ حکام سے فوری اور شفاف تحقیقات کا مطالبہ کیا ہے تاکہ ذمہ داران کو جلد از جلد کیفرِ کردار تک پہنچایا جا سکے۔
علاقے میں اس وقت افسردگی اور خوف کی فضا قائم ہے، جبکہ پولیس نے اہلِ علاقہ کو یقین دلایا ہے کہ واقعہ میں ملوث عناصر کو کسی صورت بخشا نہیں جائے گا۔
