27 ویں آئینی ترمیم قومی اسمبلی سے پہلے سینیٹ میں پیش کی جائے، اسحاق ڈار

27 ویں آئینی ترمیم قومی اسمبلی سے پہلے سینیٹ میں پیش کی جائے، نائب وزیراعظم سینیٹر اسحاق ڈار نے کہا ہے کہ یہ میری تجویز ہے جس پر حکومت کو غور کرنا چاہیے ۔

یہ تجویز انہوں نے سینیٹ سے خطاب کرتے ہوئے دی۔ اسحاق ڈار نے کہاکہ ہم ترمیم کے حوالے اتحادیوں سے مشاورت کریں گے۔

ان کا کہنا تھاکہ  یہ نہیں ہوگا کہ جلد بازی میں ترمیم منظور کرلی جائے۔ انہوں نے کہاکہ حکومت اتحادیوں کو ساتھ لے کر چل رہی ہے۔

نائب وزیراعظم نے کہاکہ   27ویں آئینی ترمیم کی حتمی دستاویز جلد پیش کردی جائے گی ۔ ان کا کہناتھاکہ سینیٹ میں اپوزیشن لیڈر کی تعیناتی بالکل ہونی چاہیے، قائد حزب اختلاف اس ایوان کا حصہ ہیں۔

اانہوں نے کہاکہ چیئرمین سینیٹ رولز کے مطابق اس عمل کو مکمل کریں۔ اسحاق ڈار نے کہاکہ آئینی ترمیم پیرا شوٹ نہیں ہو رہی، ہم اس پر شراکت داروں اور وکلا فورمز سے بھی بات کریں گے۔

واضح رہے کہ حکومت نے 27ویں آئینی ترمیم کرنے کا حتمی فیصلہ کرتے ہوئے پیپلز پارٹی سے حمایت مانگ لی ہے۔