بورڈ آف پیس کے مشن کے نفاذ میں تعاون کے عزم کی تجدید کرتے ہیں، ممالک کا مشترکہ اعلامیہ
مصر، پاکستان اور متحدہ عرب امارات پہلے ہی بورڈ آف پیس میں شمولیت کا اعلان کرچکے ہیں۔
-
ویب ڈیسک -
January 21, 2026
اسلام آباد: غزہ میں قیام امن کے نفاذ کے لئے ڈونلڈ ٹرمپ کی جانب سے تجویز کردہ بورڈ آف پیس میں شامل ممالک نے مشترکہ اعلامیہ جاری کردیا۔
ترجمان دفتر خارجہ کے مطابق بورڈ آف پیس سے متعلق پاکستان، مصر، ہاشمی اردن، متحدہ عرب امارات، انڈونیشیا، ترکیہ، سعودی عرب اور قطر کے وزرائے خارجہ کی جانب سے مشترکہ اعلامیہ جاری کردیا گیا ہے۔
اعلامیے میں امریکہ کے صدر ڈونلڈ ٹرمپ کی جانب سے بورڈ آف پیس میں شامل ہونے کی دعوت کا خیرمقدم کیا گیا ہے اور بورڈ میں شمولیت کے مشترکہ فیصلے کا اعلان کیا گیا ہے۔
مشترکہ اعلامیے میں کہا گیا ہے کہ ہر ملک اپنی متعلقہ قانونی اور دیگر ضروری داخلی کارروائیوں کی تکمیل کے بعد شمولیتی دستاویزات پر دستخط کرے گا۔
اعلامیے میں بتایا گیا ہے کہ مصر، پاکستان اور متحدہ عرب امارات پہلے ہی بورڈ آف پیس میں شمولیت کا اعلان کرچکے ہیں۔
وزرائے خارجہ نے صدر ٹرمپ کی قیادت میں امن کی کوششوں کے لیے اپنے اپنے ممالک کی حمایت کا بھی اعادہ کیا ہے۔
اعلامیے میں یہ بھی کہا گیا ہے کہ شریک ممالک بورڈ آف پیس کے مشن کے نفاذ میں تعاون کے عزم کی تجدید کرتے ہیں۔
مشترکہ اعلامیے کے مطابق بورڈ آف پیس کو عبوری انتظامیہ کے طور پر غزہ کے تنازع کے خاتمے کے لیے جامع منصوبے کے تحت تشکیل دیا گیا ہے جس کی توثیق اقوام متحدہ کی سلامتی کونسل کی قرارداد 2803 کے ذریعے کی گئی ہے۔
اعلامیے میں مزید کہا گیا ہے کہ بورڈ آف پیس کے مشن کا مقصد غزہ میں مستقل جنگ بندی کو مستحکم کرنا، انسانی امداد اور تعمیرِ نو کی حمایت کرنا اور فلسطینی عوام کے حقِ خود ارادیت اور ریاست کے قیام پر مبنی، بین الاقوامی قانون کے مطابق منصفانہ اور پائیدار امن کو فروغ دینا ہے۔
