سندھ حکومت نے صوبہ کے تمام تعلیمی بورڈز میں ’نمبر سسٹم‘ ختم کر دیا
پالیسی کے تحت پاسنگ مارکس کی کم از کم حد 40 فیصد مقرر کی گئی ہے
-
مریم حسن -
January 20, 2026
سندھ حکومت نے صوبہ کے تمام تعلیمی بورڈز میں ’نمبر سسٹم‘ ختم کردیا ہے۔
وزیر جامعات سندھ اسماعیل راہو نے میٹرک اور انٹر کے لیے نئے گریڈنگ نظام کی منظوری دیدی، 40 فیصد سے کم نمبر لینے والے طلبہ فیل تصور ہوں گے۔
وزیر جامعات سندھ کا کہنا ہے کہ تعلیمی بورڈز میں امتحانی نتائج کے لیے رائج قدیم نمبر سسٹم ختم کرکے بین الاقوامی معیار کا نیا ’گریڈنگ سسٹم‘ نافذ کرنے کی منظوری دے دی ہے، یہ اہم فیصلہ انٹر بورڈ کو آرڈینیشن کمیشن (IBCC) کے وفاقی سطح پرکیے گئے پالیسی فیصلوں کی روشنی میں کیا گیا ہے، نئے گریڈنگ سسٹم کا اطلاق صوبہ بھر میں مرحلہ وار ہوگا۔
یہ بھی پڑھیں: سندھ کے تعلیمی بورڈز میں تعلیمی امور جدید اور آن لائن بنانے کا فیصلہ
محمد اسماعیل کے مطابق رواں سال 2026 میں 9ویں اور 11ویں (SSC-I / HSSC-I) کے پہلے سالانہ امتحانات سے اس کا آغاز کیا جائے گا، جبکہ سال 2027 میں دہم اور بارہویں (SSC-II / HSSC-II) کے سالانہ امتحانات پر بھی اس کا اطلاق ہوگا۔
وزیر جامعات سندھ۔ نے کہا کہ اب طلبہ کی کارکردگی کو نمبروں کے بجائے درج ذیل گریڈز میں تقسیم کیا جائے گا۔
محمد اسماعیل راہو کے مطابق اے ڈبل پلس (A++)، 96 فیصد سے100 فیصد، جبکہ اے پلس (A+): 91 فیصد سے 95 فیصد ہوگا۔
اے (A) 86 فیصد سے 90 فیصد جبکہ بی ڈبل پلس (B++) 81 فیصد سے 85 فیصد ہوگا، اسی طرح بی پلس (B+): 76 فیصد سے 80 فیصد جبکہ بی (B): 71 فیصد سے 75 فیصد ہوگا۔
سی پلس (C+) 61 فیصد سے 70 فیصد، جبکہ سی (C): 51 فیصد سے 60 فیصد ہوگی۔
اسی طرح ڈی (D): 40 فیصد سے 50 فیصد امرجنگ ہوگا، یو (U) 40 فیصد سے کم (ناکام / انڈر گریڈ) ہوگا۔
وزیر جامعات سندھ کا کہنا ہے کہ نئی پالیسی کے تحت پاسنگ مارکس کی کم از کم حد 40 فیصد مقرر کی گئی ہے، وہ طلبہ جو کسی بھی پرچے میں 40 فیصد سے کم نمبر حاصل کرینگے، انہیں ’یو‘ یعنی ’ان گریڈڈ‘ قرار دیا جائے گا، تاہم ایسے طلبہ کو اسی پرچے میں دوبارہ امتحان دے کر اپنی کارکردگی بہتر کرنے کا موقع فراہم کیاجائے گا۔
محمد اسماعیل راہو نے مزید کہا کہ اس نظام کا مقصد ملک بھر کے تعلیمی بورڈز میں یکسانیت لانا ہے، تمام بورڈز میں اس نظام کے مکمل نفاذ کے بعد مستقبل میں جی پی اے (GPA) سسٹم بھی متعارف کرایا جائے گا، جبکہ سندھ حکومت نے اس نئی پالیسی کی باقاعدہ منظوری دے دی ہے۔
