پاکستان نے ون ڈے سیریز کے پہلے میچ میں دلچسپ مقابلے کے بعد مہمان جنوبی افریقہ کو 2 وکٹوں سے شکست دے کر سیریز میں ایک، صفر کی برتری حاصل کر لی۔
فیصل آباد کرکٹ اسٹیڈیم میں کھیلے گئے میچ میں پاکستان نے سنسنی خیز مقابلے کے بعد جنوبی افریقہ کا 264 رنز کا ہدف 2 گیندیں قبل حاصل کیا، پاکستان کی جانب سے سلمان علی آغا نے 62، محمد رضوان نے 55 اور ٹاپ آرڈر بیٹر فخر زمان نے 45 رنز بنا کرقومی ٹیم کے لیے جیت کی راہ ہموار کی۔
صائم ایوب 39 رنز بنا کر آؤٹ ہوئے، محمد نواز 9 اور بابر اعظم صرف 7 رنز بنا کر پویلین واپس لوٹ گئے۔
جنوبی افریقہ کی جانب سے لنگی نگیڈی، ڈونووین فریرا اور کوربن بوش نے 2،2 کھلاڑیوں کو آؤٹ کیا، جارج لنڈے اور بجورن فورچوئن نے ایک،ایک وکٹ حاصل کی۔
پہلے بیٹنگ کرتے ہوئے جنوبی افریقہ کی پوری ٹیم 49.1 اوور میں 263 رنز پر آل آؤٹ ہوئی، پروٹیز کی جانب سے کوئنٹن ڈی کوک 63 اور لوان ڈرے پریٹوریئس 57 رنز بناکر نمایاں رہے۔
اس سے قبل شاہین شاہ آفریدی نے ٹاس جیت کر مہمان ٹیم کو بلے بازی کی دعوت تو کوئنٹن ڈی کوک اور وان ڈرے پریٹوریئس نے ٹیم کو 98 رنز کا عمدہ آغاز فراہم کیا، پریٹوریئس 57 رنز بناکر صائم ایوب کا شکار بنے۔
ڈی کوک نے ٹونی ڈی زورزی کے ساتھ مل کر 43 رنز کی شراکت قائم کی اور اس دوران اپنی نصف سنچری بھی مکمل کی، وہ 63 رنز بنانے کے بعد نسیم شاہ کی گیند پر بولڈ ہوگئے جبکہ زورزی 18 رنز بناکر صائم ایوب کی باؤلنگ پر انہی کو کیچ دے بیٹھے۔
پروٹیز کپتان میتھیو بریٹزکے نے 42 رنز کی اننگز کھیلی، ڈیبیو کرنے والے سینیتمبا قیشیلے 22 رنز پر اپنی وکٹ گنوا بیٹھے، ڈونووین فریرا 3، جارج لنڈے 2، رنز بنانے کے بعد آؤٹ ہوئے جبکہ کوربن بوش نے 41 رنز کی جارحانہ اننگز کھیلی۔
قومی ٹیم کی جانب سے ابرار احمد اور نسیم شاہ نے 3،3 صائم ایوب 2 جب کہ محمد نواز اور شاہین آفریدی نے ایک ایک وکٹ حاصل کی۔
جنوبی افریقہ کی جانب سے سینیتمبا قیشیلے نے اپنا پہلا ایک روزہ میچ کھیلا، جو ڈیوالڈ بریوس کی انجری کے باعث ٹیم میں شامل کیے گئے ہیں، اس کے علاوہ اوپنر لوان-ڈرے پریٹوریئس نے بھی ڈیبیو کیا۔
واضح رہے کہ پاکستان اور جنوبی افریقہ کے درمیان ٹیسٹ سیریز ایک ایک سے برابر رہی تھی جبکہ ٹی 20 سیریز میں پاکستان نے 1-2 سے کامیابی حاصل کی تھی۔
