بنگلا دیشی کھلاڑی کو نکالنے پر معین علی آئی پی ایل پر برس پڑے
ماضی میں پاکستانی کھلاڑی بھی اسی نوعیت کے حالات اور امتیازی رویے کا سامنا کرتے رہے ہیں
-
ویب ڈیسک -
January 7, 2026
انگلینڈ کے سابق آل راؤنڈر معین علی نے بنگلادیش کے فاسٹ بولر مستفیض الرحمان کو آئی پی ایل اسکواڈ سے نکالے جانے کے فیصلے پر مایوسی کا اظہار کرتے ہوئے کہا ہے کہ اس طرح کے اقدامات عالمی کرکٹ میں نئی بات نہیں ہیں۔
ان کے مطابق ماضی میں پاکستانی کھلاڑی بھی اسی نوعیت کے حالات اور امتیازی رویے کا سامنا کرتے رہے ہیں۔
ایک انٹرویو میں معین علی نے عالمی کرکٹ کے نظام پر سوال اٹھاتے ہوئے کہا کہ یہ بات سب پر عیاں ہے کہ کرکٹ کے فیصلوں پر اثر انداز ہونے والی طاقتیں کون سی ہیں، مگر اس سچ پر کھل کر بات کرنے سے گریز کیا جاتا ہے۔ ان کا کہنا تھا کہ آئی سی سی جیسے ادارے بھی اس صورتحال میں مؤثر کردار ادا کرنے میں ناکام دکھائی دیتے ہیں۔
معین علی کے مطابق آسٹریلیا اور انگلینڈ کے کرکٹ بورڈز اکثر اپنے مفادات کے تحفظ کی خاطر خاموشی اختیار کیے رکھتے ہیں، کیونکہ عالمی سیاست اور کرکٹ کا نظام اسی طرز پر چل رہا ہے۔
انہوں نے افسوس کا اظہار کرتے ہوئے کہا کہ مستفیض الرحمان کا آئی پی ایل سے باہر ہونا اسی سلسلے کی ایک کڑی ہے جو برسوں سے جاری ہے، لیکن ایسے معاملات کو دبانے کی روایت بن چکی ہے۔
سابق انگلش کرکٹر نے یاد دلایا کہ پاکستانی کھلاڑی بھی طویل عرصے تک ایسے امتیازی سلوک کا شکار رہے، تاہم ان کے تحفظات کو کبھی سنجیدگی سے نہیں لیا گیا۔
ادھر بنگلادیش کے ٹی ٹوئنٹی ورلڈ کپ کے لیے بھارت نہ جانے کے فیصلے پر بات کرتے ہوئے معین علی نے کہا کہ وہ اس معاملے میں بنگلادیش کے مؤقف کو سمجھتے ہیں اور انہیں اس فیصلے کا ذمہ دار نہیں ٹھہراتے۔
