ای سگریٹ؛ تمباکو کا متبادل نہیں، نئی لت اور کینسر کا خطرہ
دنیا بھر میں 10 کروڑ سے زیادہ لوگ ای سگریٹ استعمال کررہے ہیں جن میں 1.5 کروڑ بچے شامل ہیں۔
-
ویب ڈیسک -
April 14, 2026
آکسفورڈ یونیورسٹی کی تحقیق کے مطابق اگرچہ نیکوٹین والے ای سگریٹ تمباکو چھوڑنے میں کچھ حد تک مددگار ثابت ہوسکتے ہیں لیکن ماہرین نے خبردار کیا ہے کہ یہ صحت کے لیے مکمل طور پر غیر محفوظ ہیں اور ان کے استعمال سے بچنا ہی بہتر ہے۔
تحقیق کے مطابق ہر 100 میں سے صرف 2 سے 5 افراد ہی ای سگریٹ کے ذریعے سگریٹ چھوڑنے میں کامیاب ہوتے ہیں جب کہ باقی افراد نہ صرف تمباکو کی لت سے چھٹکارا نہیں پا پاتے بلکہ ای سگریٹ کی نئی لت میں بھی مبتلا ہوجاتے ہیں۔
صحت کے لیے سنگین خطرات
فروری 2026 کی ایک تحقیق نے تصدیق کی ہے کہ ای سگریٹ استعمال کرنے والے بھی کینسر پیدا کرنے والے کیمیکلز سے محفوظ نہیں رہتے۔
ڈبلیو ایچ او کے مطابق ای سگریٹ میں موجود نیکوٹین بچوں اور نوجوانوں میں شدید لت کا سبب بن رہی ہے جو ان کی ذہنی اور جسمانی نشوونما کو نقصان پہنچاسکتی ہے۔
عالمی ادارہ صحت نے واضح کیا ہے کہ ای سگریٹ نے برسوں کی تمباکو نوشی کے خلاف پیش رفت کو نقصان پہنچایا ہے۔
2025 کے تخمینوں کے مطابق دنیا بھر میں 10 کروڑ سے زیادہ لوگ ای سگریٹ استعمال کررہے ہیں جن میں 1.5 کروڑ بچے شامل ہیں۔
ماہرین کا مشورہ
تمباکو چھوڑنے کے خواہشمند افراد کے لیے بہتر یہی ہے کہ وہ ڈاکٹر کی نگرانی میں محفوظ طریقے اپنائیں، نہ کہ ای سگریٹ جیسے غیر محفوظ ذرائع کا سہارا لیں۔
ڈبلیو ایچ او نے تمام ممالک پر زور دیا ہے کہ وہ ای سگریٹ کی فروخت اور تشہیر پر سخت پابندیاں عائد کریں۔
