امریکا کی یونیورسٹی آف میامی کے محققین نے ایک بڑی تحقیق کے بعد یہ نتیجہ اخذ کیا ہے کہ جن لوگوں نے کبھی شادی نہیں کی ان میں کینسر ہونے کا خطرہ شادی شدہ یا سابقہ شادی شدہ افراد کے مقابلے میں کہیں زیادہ ہوتا ہے۔
ماہرین نے اس تحقیق کے لیے 12 امریکی ریاستوں میں 2015 سے 2022 کے درمیان 30 سال یا اس سے زیادہ عمر کے 40 لاکھ سے زائد کینسر کے مریضوں کے ڈیٹا کا تجزیہ کیا۔
یہ ایک قسم کا ’’وقتی جائزہ‘‘ تھا جس میں وقت کے ساتھ کینسر کی شرح پر شادی کے اثرات کو نہیں دیکھا گیا۔
اعداد و شمار کے مطابق غیر شادی شدہ مردوں میں کینسر کی شرح ان مردوں کے مقابلے میں 68 فیصد زیادہ پائی گئی جنہوں نے کبھی شادی کی تھی۔
غیر شادی شدہ خواتین میں یہ فرق اور بھی زیادہ تھا، ان میں کینسر کا خطرہ شادی شدہ یا سابقہ شادی شدہ خواتین کے مقابلے میں 85 فیصد زیادہ ریکارڈ کیا گیا۔
کن کینسروں میں سب سے زیادہ فرق تھا؟
محققین کے مطابق مردوں میں مقعد کے کینسر کی شرح غیر شادی شدہ افراد میں ان لوگوں کے مقابلے میں پانچ گنا زیادہ تھی جنہوں نے کبھی شادی کی تھی۔
خواتین میں رحم کے کینسر کی شرح غیر شادی شدہ خواتین میں تین گنا زیادہ پائی گئی۔ ان دونوں کینسروں کا تعلق جنسی طور پر پھیلنے والے وائرس (ایچ پی وی) سے ہے۔
وہ کینسر جن کی باقاعدہ اسکریننگ ہوتی ہے، جیسے چھاتی کا کینسر یا پرواسٹیٹ کا کینسر جن میں شادی شدہ اور غیر شادی شدہ کے درمیان فرق کم تھا۔
کیا شادی خود کینسر سے بچاتی ہے؟
محققین نے واضح کیا کہ شادی خود کینسر کا سبب نہیں بنتی یا اس سے بچاتی نہیں ہے بلکہ شادی شدہ افراد میں صحت مند طرز زندگی اپنانے کے امکانات زیادہ ہوتے ہیں۔
مثال کے طور پر شادی شدہ افراد کم سگریٹ نوشی کرتے ہیں، ان کا تناؤ کم ہوتا ہے اور وہ اپنے شریک حیات کے کہنے پر ڈاکٹر کے پاس جلد چیک اپ کرواتے ہیں۔
اس کے علاوہ تحقیق میں ان جوڑوں کو بھی غیر شادی شدہ ہی شمار کیا گیا جو ساتھ رہتے ہیں لیکن باضابطہ شادی نہیں کرتے۔
غیر شادی شدہ افراد کیا کریں؟
محققین کا کہنا ہے کہ اس تحقیق کا مطلب یہ نہیں کہ ہر کوئی جلدی سے شادی کرلے بلکہ غیر شادی شدہ افراد کو چاہیے کہ وہ اپنی صحت پر زیادہ توجہ دیں، کینسر کے خطرے کے عوامل کو سمجھیں اور بروقت اسکریننگ کروائیں۔
