آئی جی سندھ کا نیشنل اسٹیڈیم کا دورہ، پی ایس ایل میچز کی سیکیورٹی صورتحال کا جائزہ
پی سی بی کے نمائندگان نے بھی انتظامات پر اطمینان کا اظہار کرتے ہوئے سیکیورٹی اقدامات کو تسلی بخش قرار دیا
-
ویب ڈیسک -
April 13, 2026
انسپکٹر جنرل سندھ پولیس جاوید عالم اوڈھو نے کراچی کے نیشنل اسٹیڈیم کا دورہ کیا، جہاں انہوں نے پاکستان کرکٹ بورڈ کے زیر اہتمام جاری پی ایس ایل 2026 کے میچز کے دوران سیکیورٹی انتظامات کا تفصیلی جائزہ لیا۔
دورے کے موقع پر ڈی آئی جی سیکیورٹی اینڈ ایمرجنسی سروسز نے آئی جی سندھ کو مجموعی سیکیورٹی پلان، حکمت عملی اور مختلف اداروں کے درمیان ہم آہنگی پر جامع بریفنگ دی۔
پی سی بی کے نمائندگان نے بھی انتظامات پر اطمینان کا اظہار کرتے ہوئے سیکیورٹی اقدامات کو تسلی بخش قرار دیا۔
اس موقع پر ایس ایس پی ایسٹ، کمانڈنٹ ایس ایس یو، ایس پی گلشن اور دیگر پولیس افسران بھی موجود تھے۔ آئی جی سندھ نے ڈیوٹی پر مامور افسران اور اہلکاروں کی کارکردگی کو سراہتے ہوئے مزید بہتری کے لیے ہدایات جاری کیں۔
انہوں نے زور دیا کہ اسٹیڈیم کے داخلی و خارجی راستوں، پارکنگ ایریاز اور اطرافی علاقوں کی سخت نگرانی کو ہر صورت یقینی بنایا جائے۔ ساتھ ہی جدید سرویلنس سسٹم، کیمروں اور سرچنگ کے عمل کو مزید مؤثر بنانے کی ہدایت دی۔
جاوید عالم اوڈھو نے کہا کہ کوئیک رسپانس فورس اور ٹریفک مینجمنٹ کے انتظامات ہر وقت فعال اور الرٹ رہنے چاہئیں، تاکہ کسی بھی ہنگامی صورتحال سے فوری طور پر نمٹا جا سکے۔
ان کا مزید کہنا تھا کہ بڑے اسپورٹس ایونٹس کے پُرامن انعقاد کے لیے تمام متعلقہ اداروں کے درمیان مضبوط رابطہ اور مکمل ہم آہنگی انتہائی ضروری ہے، جس سے شہریوں اور شائقین کو محفوظ ماحول فراہم کیا جا سکتا ہے۔
