پی ایس ایل 11 نے ڈیجیٹل دنیا ہلا دی، ابتدائی 22 میچز نے اربوں ویوز کا ریکارڈ توڑ دیا
ویڈیو کانٹینٹ کی مد میں دو بلین منٹس سے زائد کا واچ ٹائم بھی سامنے آیا
-
ویب ڈیسک -
April 16, 2026
پاکستان سپر لیگ سیزن 11 کے پہلے 22 میچز نے صرف میدان ہی نہیں بلکہ ڈیجیٹل پلیٹ فارمز پر بھی دھوم مچا دی، جہاں شائقین کی دلچسپی نے نئے ریکارڈ قائم کر دیے۔
اعداد و شمار کے مطابق مختلف سوشل میڈیا پلیٹ فارمز پر صرف آرکائیو اور نان لائیو اسٹریمنگ کانٹینٹ جس میں ریلز، شارٹ ویڈیوز اور دیگر پوسٹس شامل ہیں کو ایک اعشاریہ ایک بلین (1.1 ارب) سے زائد ویوز حاصل ہوئے۔
اسی دوران ان میچز کے دوران ڈیجیٹل پلیٹ فارمز پر مجموعی طور پر تین اعشاریہ تین سات بلین (3.37 ارب) امپریشنز بھی ریکارڈ کیے گئے، جو شائقین کی غیر معمولی دلچسپی کو ظاہر کرتے ہیں۔
مزید برآں، ویڈیو کانٹینٹ کی مد میں دو بلین منٹس سے زائد کا واچ ٹائم بھی سامنے آیا، جو اس بات کا واضح ثبوت ہے کہ لیگ کی مقبولیت سوشل میڈیا پر مسلسل بڑھ رہی ہے۔
اہم بات یہ ہے کہ ان تمام اعداد و شمار میں ڈیجیٹل لائیو اسٹریمنگ شامل نہیں، یعنی اصل ویورشپ اس سے کہیں زیادہ ہو سکتی ہے۔
