’کسی کا گھر اجڑ جائے تو یہ خوشی کی بات نہیں‘ بشریٰ انصاری کے طنز پر جاوید شیخ کا ردعمل
سوشل میڈیا پروائرل ہونے والی ویڈیو کلپ پر صارفین کی جانب سے جاوید شیخ کی حمایت کرتے ہوئے بشریٰ انصاری کے اس تبصرے پر افسوس کا اظہار کر رہے ہیں
-
ویب ڈیسک -
January 16, 2026
پاکستان کے سینئر اور معروف اداکار جاوید شیخ نے طلاق سے متعلق اداکارہ بشریٰ انصاری کے طنز پر برہمی کا اظہار کیا ہے۔
پاکستان شوبز انڈسٹری کے ہردلعزیز اداکار جاوید شیخ نے حال ہی میں اپنے ساتھی فنکاروں بہروز سبزواری، روبینہ اشرف، بشریٰ انصاری اور شبیر جان کے ہمراہ ایک پریس ایونٹ میں شرکت کی۔
تقریب کے دوران بشریٰ انصاری نے جاوید شیخ کی طلاق سے متعلق گفتگو کرتے ہوئے طنزیہ جملہ کہا، جو سینئر اداکار کو ناخوشگوار گزرا اور اس پر سخت ردِعمل دے دیا۔
اسی تقریب کی ایک ویڈیو اس وقت سوشل میڈیا پر گردش کر رہی ہے، جس میں بشریٰ انصاری کو یہ کہتے ہوئے سنا جا سکتا ہے کہ میں جاوید شیخ کے گھر گئی تھی، انہوں نے مجھے کچھ کھانے کو بھی نہیں دیا کیونکہ ان کے پاس اس وقت کوئی گھر ہی نہیں تھا۔ ان کا گھر میری آنکھوں کے سامنے بنا اور میری آنکھوں کے سامنے ہی اجڑ گیا، یہ سب میری وجہ سے نہیں بلکہ میرے سامنے ہوا۔
یہ بھی پڑھیں: اگرچہ اسلام میں مرد کو چار شادیوں کی اجازت ہے لیکن شادی ایک ہی کافی ہے، جاوید شیخ
اس پر جاوید شیخ نے برہمی کا اظہار کرتے ہوئے جواب دیا کہ ’بشریٰ نے میری طلاق پر جو کچھ کہا وہ مذاق میں کہا، لیکن کسی کا گھر اجڑ جائے، ٹوٹ جائے یہ خوشی کی بات نہیں ہے، میں نے کبھی ان کے ٹوٹے ہوئے گھر پر بات نہیں کی اور نہ ہی یہ سوال اٹھایا کہ ان کی شادی کیوں ختم ہوئی۔‘
جاوید شیخ نے بشریٰ انصاری کو مخاطب کرتے ہوئے کہا کہ ’آئندہ جب بھی میری کہانی سناؤ تو اپنی کہانی بھی ضرور سنانا، کیونکہ تمہاری شادی بھی کامیاب نہیں ہو سکی تھی۔
سوشل میڈیا پروائرل ہونے والی ویڈیو کلپ پر صارفین کی جانب سے جاوید شیخ کی حمایت کرتے ہوئے بشریٰ انصاری کے اس تبصرے پر افسوس کا اظہار کر رہے ہیں۔
ایک صارف نے لکھا کہ دونوں فنکاروں کی دوستی نظرِ بد کا شکار ہو گئی جبکہ ایک اور صارف کا کہنا تھا کہ بشریٰ انصاری بعض اوقات غیر ضروری اور حد سے زیادہ بات کر جاتی ہیں۔
ایک اور تبصرے میں کہا گیا کہ بشریٰ ایک عظیم فنکارہ اور لیجنڈ ہیں، مگر عمر کے ساتھ ان کا رویہ بدلتا ہوا محسوس ہو رہا ہے۔ متعدد صارفین نے جاوید شیخ کا دفاع کرتے ہوئے انہیں لیجنڈ قرار دیا اور ان پر کیے گئے طنز پر شدید ناراضی کا اظہار کیا۔
